Villreinjakt på Ullensvang statsallmenning for innanbygdsbuande 2024

Oppdatert info om reinsjakta på Ullensvang statsallmenning på Hardangervidda hausten 2024: http://www.hardangervidda-fjellstyra.no/info-om-reinsjakta-pa-ullensvang-statsallmenning-2024

Dei som er busett i områda som låg i Ullensvang herad (utanom Storås og Lilleås) og bygdene Kvanndal og Lussand kan søke om kort med tilgang på Eidfjord statsallmenning sør for Nordmannslågen. For å gjere det skriv du «Ja» under «Tilleggskriterier» på spørsmålet «Ønsker tilgang til tilleggsfelt». Dette gjer du etter at du har trykt "Fyll ut søknaden".

Jaktstatistikk for valdet:

Korta gjeld på valda HA 281 og HA 282. Du finn felllingsstatistikk for valda på www.hjorteviltregisteret.no/statistikk/villrein

Ullensvang statsallmenning ligg midt inne på Hardangervidda og det er langt å gå. Dette gjeld sama kva rute du vel. https://ut.no/kart gir ei grei oversikt over avstandar.

Det er to hovudruter inn i Ullensvang statsallmenning:

Alt: 1: Du kan ta Rv. 7 over Hardangervidda til Tråastølen, (Eidfjord statsallmenning),  køyr Tinnhølvegen (bomveg) til parkeringsplass ved Tinnhølen. Derfrå ta beina fatt på turstien innover mot Sandhaug og vidare i retning t.d. Litlos.

Alt: 2: Køyr E-134 til Røldal, ta av innover Valldalsvegen, 14 km til parkering. Så er det beina fatt opp Vivassdalen, gå turvegen i retning Litlos. Her går du over Røldal statsallmenning før du kjem inn i Ullensvang statsallmenning.

Eit tredje alternativ er å gå frå Haukelisæter (på E-134 over Haukelifjell) innover mot/over Røldal statsallmenning og vidare til Ullensvang statsallmenning. Dette alternativet er kanskje det lengste og tyngste, men ein flott tur.

Kartbladet "Hardangervidda Vest" i M1:100 000 viser det meste av området med vegar og turstiar.

Merk at det meste av Ullensvang statsallmenning ligg i Hardangervidda nasjonalpark. Det er blant anna bandtvang for hund heile året i nasjonalparken, og det er ikkje lovleg å bruke sykkel utanom på traktorslepene (elsykkel er ikkje lov). Verneforskrifta: https://lovdata.no/dokument/LF/forskrift/1981-04-10-4830

Motorferdsel i Hardangervidda nasjonalpark:

Motorferdsel er i utgangspunktet forbode i Hardangervidda nasjonalpark. Det er mogleg å søke om landingsløyve for helikopter/sjøfly i samband med blant anna storviltjakt og garnfiske. Det er ikkje opning for å få løyve til motorferdsel i samband med stongfiske og småviltjakt. Søknad om løyve til motorferdsel i nasjonalparken skal sendast til Tilsynsutvalet i Vestlandet for Hardangervidda nasjonalpark. For meir info om motorferdsel, kontakt Tilsynsutvalet: https://ullensvang.kommune.no/artikkel/tilsynsutvalet-i-vestland-for-hardangervidda-nasjonalpark/  

I villreinjakta kan jegerar med fellingstillatelse på Ullensvang statsallmenning nytte helikopter til fastsette landingsplassar utan særskilt løyve. Info om dette blir sendt ut til dei som er tildelt jakt.