Elgjakt i Ullensvang statsallmenning på Hardangervidda 2024 og 2025

Ullensvang fjellstyre tilbyr elgjakt i Ullensvang statsallmenning på  elgvald som vart godkjendt i 2011. Alt teljande areal ligg mellom ca 1000 m.o.h. opptil 1200 m.o.h. Kvote er på tre dyr årleg. Sidan oppstart i 2012 har det stort sett blitt felt dyr kvart år (sjå fellingsdata i Hjortevilregisteret)

Kvote

Kvota er årleg på tre dyr. Heile kvota blir tildelt jaktlaget. Fordeling i 2024 er ikkje klar, men truleg blir kvota på ein okse, ei ku og ein kalv.

Jakttid

Det er vedteke utvida jakttidsramme til og med 2024. Fjellstyret har vedteke jakttid for 2024 15. august til og med 23. desember. I utgangspunktet vil jakttida i 2025 vere frå 25. september, dersom utvida jakttidsramme ikkje blir vidareført.

Merk at bruk av laust hund under jakt ikkje er tillete i perioden 15 august - 31. august, jf. forskrift om utvida jakttid.

Beste området for jakta er  i området rundt Hansbu, langs Kvenna eit stykkje vestover mot Kvennsjøen, heile Låven og Bjørnadalen ned mot Jakobsbuvatnet og til grensa mot Telemark. Truleg har elgane kome inn i Ullensvang statsallmenning frå Telemark. I Jakobsbudalen og området rundt Hansbu - Låven er det no elg meir eller mindre heile året. 

Fordeling innanbygdsbuande/utanbygdsbuande

Fjellstyret har vedteke ein tiårsplan for fordeling av jakta mellom innanbygdsbuande og utanbygdsbuande gjeldande frå 2022 til 2031 (jf. forskrift om jakt, felling, fangst og fiske i statsallmenning § 2). For åra 2024 og 2025 skal jakta tildelast eit utanbygdsbuande jaktlag.

Innanbygdsbuande er dei som er busett innanfor grensene for Ullensvang herad før kommunesamanslåinga i 2020, jf. forskrift om jakt, felling, fangst og fiske i statsallmenning § 3. Jaktlaget er å rekne som innanbygdsbuande dersom fleire enn halvparten av medlemmene i jaktlaget, inkludert jaktlagsansvarleg, er innanbygdsbuande.

Kvar ligg terrenget?

Terrenget ligg langt frå bilveg, ein må rekna 6 - 7 timar gangtid for å koma inn i terrenget. Arealet ligg i Hardangervidda nasjonalpark. 
Det er mogleg å søke vernemyndigheite om løyve til landing med helikopter/sjøfly i samband med storviltjakt, til transport inn og ut av terrenget, inkludert uttransport av felt storvilt. Meir informasjon om regelverket for motorferdsel i nasjonalparken kan ein få ved å kontakte Tilsynsutvalet i Vestland for Hardangervidda nasjonalpark (tlf 53654000, e-post tilsynsutvalet.hordaland@ullensvang.kommune.no). 

Ullensvang fjellstyre har husvere til utleige for jegerar og fiskarar, meir informasjon om desse kan ein få ved å gå inn på heimesida. http://hardangervidda-fjellstyra.no/framside-ullensvang