Småviltjakt utanbygdsbuande i Finndalen statsallmenning

Dei som blir trekt ut får ein e-post og SMS om dette. Blir det søkt som jaktlag vil alle få same tilbodet. Du får ein frist til å takke ja/nei, som må overhaldast. Du får berre eitt tilbod. Hvis du ikkje får tilbod blir du ståande på venteliste. Vi tildeler vidare frå denne ventelista dersom nokon takkar nei til tilbodet sitt. Pass på at e-post og telefonnummer er korrekt utfylt slik at du får dei beskjedane du skal. Vi legg også ut melding på heimesida når trekninga er gjennomført.

Ved å søkje/kjøpe jakt hjå Finndalen fjellstyre aksepterer du følgjande:

1. Godtek at namnet ditt, adresse, postnummer, poststed og tildelt tilbod kan bli offentleggjort. Dette gjeld også eventuelle jaktlagsmedlemmar.
2. Ved å søkje på jakt plikter du å setje deg inn i reglar for søknad, trekning og jaktutøving hjå Finndalen fjellstyre.
3. Jaktlaget er bindande og jegerar på laget kan ikkje endrast etter søknadsfrist/trekning.
4. Jaktkortet er personleg, og kan ikkje overdragast til andre. 
5. Betalt jaktkort blir ikkje refundert. Sjukdom, vær- og føreforhold er ikkje grunnlag for å få tilbakebetalt jaktkort. Dersom fjellstyret vedtek å ikkje opne for jakt på rype, vil jegere få tilbod om refusjon av 75% av kortprisen. Fråtrekket er eit adiminstrasjonsgebyr som i hovudsak vil gå til å dekkje kostnadar ved bruk av Inatur, og eige administrasjonsarbeid. Det kan òg bli gjeve tilbod om å overføre kortet til neste jaktsesong, eller at kortet kan nyttast på jaktbare arter. 
6. Fjellstyret kan av omsyn til småviltbestandene innføre begrensningar på jakt og fangst før eller under jakta (som t.d kvote), eller stoppe jakta etter jaktstart på kort varsel. Dette gjev ikkje grunnlag for refusjon av betalt jaktkort eller hytte. 

Generelt om jakta

Ved normal produksjon av rype går opplegget for småviltjakta som vanleg, med fritt kortsal for jakt utan hund. Dersom det blir svært dårleg produksjon av rype, kan det bli vurdert å stoppe jakt på rype tidlegare, eventuelt å ikkje opne for jakt på rype i det heile tatt, slik det vart denne sesongen (2023/24). Jakttid, jaktområde og kvoter kan endrast før og under jakta, utan at dette gjev rett til at ein får pengane tilbake (jf. angrerettsloven §22, pkt. m).

Jakt med hund er avgrensa og blir tildelt etter søknad og trekning. Søknad sender du frå denne sida. Det er tildelt totalt 18 jaktkort fordelt på tre 5-døgnsperioder (6 kort i kvar periode). Finndalen fjellstyre har ei ordning med 3-års avtaler, slik at den som blirt uttrekt til jakt i 1. periode får tilbod om jakt i Finndalen i tre år etter kvarandre, dvs. 2. periode (20-24/9) andre året, og 3.periode (25-29/9) siste året. Dette betyr at ein kvar haust har 6 ledige kort i fyrste periode, i tillegg kjem dei som av ulike årsaker takkar nei til å fortsetja i 2. og 3. periode. 

Harejakt med hund er opna i perioden 11-17/10. Totalt 5 kort. Jaktkortet gjeld i heile statsallmenningen.

Generelt om området

Terrenget ligg på nordsida av Ottadalen, og grensar inn mot Skjåk og Lesja i vest og nord. Mykje av området ligg innanfor Reinheimen nasjonalpark/ Finndalen landskapsvernområde. Området ligg mellom ca. 800 m.o.h og 1883 m.o.h, der snaufjell utgjer størstedelen av arealet,men statsalmenningen har namnet sitt etter Finndalen, ein frodig seterdal, der elva Finna renn. Terrenget stig bratt opp frå dalbotnen dei fleste stadar, men er litt rolegare i området omkring Vangen. 

Jaktkortet dekkjer eit areal på 267 000 da, der mesteparten (257 000 da) er høgfjell. Hovuddelen av arealet er difor fjellrypeterreng, men ein finn og gode lirypebiotopar på enkelte plassar, m.a i området rundt Vangen. Området ligg på nordsida av Ottadalen, i kommunene Lom og Vågå. Det er bilveg inn til Vangen, som er open så lenge den er farbar utover hausten (tek av frå Slådalsvegen som går mellom Lesja og Vågå). På Vangen finn ein også ein enkel campingplass. Fjellstyret har ei hytte for utleige ved Råkåvatnet, og ei lita bu ved Honnsjoen. Enkelte setereigarar leiger også ut seterhus.

Bestand

Bestanden av både lirype og fjellrype har variert ein god del i dei seinare åra. Både i 2021, 2022 og 2023 var produksjonen dårlegare enn vanleg.