Råkåbua. Hytte ved Råkåvatnet i Finndalen statsallmenning, Reinheimen.

Råkåbue er ei triveleg hytte som ligg ved Råkåvatnet (1364 moh.), i Reinheimen nasjonalpark. Hytta vart bygd i 2002, og har enkel standard med vedfyring, ljos frå solcelleanlegg, gassbluss for kokking og utedo. Det er eitt rom med stue/kjøkenkrok, eitt soverom og gang/ bod (i tillegg er det eitt rom reservert til bruk for fjelloppsynet som er låst). Uthus med utedo og vedskåle like ved sida av hytta.

Antal sengeplassar er 4-5, ei familiekøye i soverommet, ein sofa i opphaldsrommet, i tillegg er det to ekstra madrasser.

I bua finn du:

Kjelar, steikepanne og kjøkkenutstyr til ca. 6 personar.

Det er gass, ved, vaskeutstyr og det mest nødvendige forbruksmateriell i bua. 

Det er ikkje sengetøy i hytta, leigetakar må ha med sovepose. Ta gjerne med laken og putetrekk.

Det høyrer med båt til dei som leiger bua. Garn/oterfiske er berre for innanbygds, men det er også fint å fiske med stong både i vatnet og frå utløpsosen og eit stykkje nedover elva. Kvaliteten på fisken er tildels svært bra. Finndalen fjellstyre sitt fiskekort dekkjer heile området. Sidan hytta ligg såpass høgt til fjells, vil tidspunkt for isløysing og islegging variere frå år til år. Normalt ligg isen til sist i juni. Med tanke på fiske, er det vanlegvis frå ca. 10. juli som er mest ideelt.

I Finndalsfjella er du stort sett einsleg, det er ikkje merka stigar og lite tilretteleggjing for turisttrafikk. Dette området eignar seg for dei som vil ha ro og fred, og som er vand med å ta seg fram i fjellet på eige hand. Delar av Finndalen statsallmenning ligg innanfor Reinheimen nasjonalpark, landets 3. største nasjonalpark, oppretta i 2006. Terrenget i denne delen av Reinheimen er prega av vide flyer og slake vidder som strekkjer seg fram mot dalføra øvst i Gudbrandsdalen. Føremålet med opprettinga av Reinheimen nasjonalpark er å ta vare på eit stort samanhengande og villmarksprega fjellområde med eit høgfjellsøkosystem med eit eigenarta og variert biologisk mangfald. Sentralt i økosystemet er leveområdet til villreinstammen i Ottadalen nord. Nasjonalparken står fram som nærast intakt for villreinen.

Tips til kart: CK39 Reinheimen og Tafjordfjella, dette er eit godt oversiktskart, elles er det kartblad "Lom" i 1.50 000 serien som dekkjer området Finndalen/ Råkåvatnet.