Forsthytta i Randsverk rett ved Jotunheimen, Vågå.

Triveleg hytte i seterområde i Randsverk i Vågå. Forsthytta vart bygd i ca. 1880, og interiør ber preg av det, så det er ei hytte med særpreg, der historia "sit i veggane". Det har opp gjennom tida vore utført ulike vedlikehaldsarbeid på hytta, så noko standardheving har det vore sidan 1880. I 2016 vart taket renovert, og det vart sett inn ein ny vedovn. I 2018 vart det gjort eit større vedlikehaldsarbeid, rommet som før var kjøken vart omgjort til soverom, slik at hytta nå har to soverom. Ny kjøkeninnreiing vart montert i opphaldsrommet. Golva vart slipte og lakka, og veggane på soveromma fekk ny farge.

Hytta ligg like ved vegen som fører inn mot Glitterheim i Jotunheimen, og er eit godt utgangspunkt for jakt, fiske og fjellturar. Om du vil gå Besseggen, tek det ca. ein halvtime med bil til Gjendeosen. Det er ca 5 km til Lemonsjøen, der det er både alpinanlegg og svært godt utbygd skiløypenett. Elles er det ca. 1 km til Randsverk Camping der det er sesongopen kiosk/butikk og kafe.

Det er to soverom med 6-8 sengeplasser (to familiekøyer, og ei vanleg køye), kjøken med spiseplass og stugu med salong, peis og spisebord i hovudrommet. Elles er det innreidd ein enkel "vaskekrok" i gangen (der er det kaldt om vinteren..), og ein "vaskekrok" på eine soverommet. Området rundt hytta er inngjerda, og med plass for parkering. Det er ein ny, men enkel "gamledags" utedo i uthuset.

Forstassistent, I. Hadeler Bruun sende i  januar 1878 ein søknad til forstmester J.B. Barth om midlar til å byggje ei forsthytte i Randsverk. Forstassistenten fann av mange ulike grunnar uhaldbart å losjere på setrene i Randsverk, i sitt arbeid i skogen i Langmorkje, m.a på grunn av mykje uro om nettene sidan "som bekjent ere arbeidsfolk her stedse oppe fra klokken 4 om morgenen, under moseinnsamlingen endog adskillig tidligere", og inneklima på setrene var vel og så som så, han skriv ihvertfall; " At ogsaa de atmosfæriske forholde under saavidt stor ansamling af Mennesker, ikke altid af renfeldigste slags, i forbindelse med at ysting og koging foregaar i samme fællesrom bliver alt andet end sunde og behagelige er en selvfølge..... . J.B. Barth sende svar om at skogdirektøren hadde innvilga søknaden med kr. 650,- til bygging av forsthytte i Randsverk den 9. juni 1878.