Fiske i Kilegrend i Fyresdal

Kilegrend fiskekortområde ligg lengst sør i Fyresdal og omfattar den sørlegaste delen av hovudvassdraget, samt heiane på aust- og vestsida. I Fyresvatn strekkjer fiskekortområdet seg nord til Våmur. Fyresvatn har to utløp som båe endar i Drang; det eine over Glomfoss gjennom Bjønnsund og Krokane og det andre over Russdammen gjennom Flatlandsvatnet. Hovudvassdraget har godt med sik, aure og røye. 

Vestsida av Midtvatn, nordsida av Krossvatn og vatna nedanfor Krossvatn er med i Kilegrend fiskekortområde, medan øvre del av Kilåvassdraget er forvalta av Valebjørg utmarkslag og har eiga fiskekortløysing. Skogsbilvegen frå Kiland er om lag 8 km lang og går langs heile denne delen av Kilåi, med Saurvatn, Krokvatn, Mjåvatn og Fjellskovatn, og med fine elvestrekningar imellom. Elles er det mot betaling mogleg å køyre frå Valebjørg og inn til Midtvatn.

Litt forbi Russdammen er det ein 6 km lang bilveg opp Bindalen til Knutsli. Vegen er open mot betaling med Vipps og er eit fint utgangspunkt for å kome til fleire gode fiskevatn på heia over mot Nesvatn.

Du finn meir informasjon om fisket i kommunen her: Fiske i Fyresdal.

Overnatting i Kilegrend- området
Øyne camping www.oyne-camping.no i sørenden av Fyresvatn har campinghytter og plassar for campingvogner og telt. Fiske er populært for dei som brukar plassen. Kilegrend hytter ligg rett attmed fylkesveg 355 og er også eit godt utgangspunkt for fiske i Kilegrend. Her kan ein få overnatting i ei sjøbu rett ved den gamle brygga. Mjåvasshytta er ei særprega hytte med god plass. Her er og også ei nyoppført sikringshytte.

Andre aktivitetar

Drang har varierte strender med sand og svaberg, og er eit eldorado for dei som også likar å bade og padle. Her finn du turforklaring og forslag til andre turmål i området: Turar i Fyresdal. Elles er det eit fint terreng for blant anna padling, bading, sykling og bærplukking.
God tur!